கள்ளக்குறிச்சியில் பிறந்து சில மணி நேரங்களே ஆன பச்சிளம் பெண் குழந்தையை வயல்வெளியில் விட்டுச் சென்ற சம்பவம் அப்பகுதியில் பெரும் பரபரப்பை ஏற்படுத்தியுள்ளது.
கள்ளக்குறிச்சி புதிய பேருந்து நிலையம் அருகே உள்ள வயல்வெளியில், குழந்தையின் அழுகுரல் கேட்டுள்ளது. இதையடுத்து அங்கு ஆடு மேய்த்துக் கொண்டிருந்த விவசாயி ஒருவர் அருகில் சென்று பார்த்தபோது, கட்டைப் பைக்குள் பிறந்து சில மணி நேரங்களே ஆன பெண் குழந்தை இருப்பதைக் கண்டு அதிர்ச்சியடைந்தார்.
குழந்தையின் தொப்புள் கொடி கூட அறுக்கப்படாத நிலையில் இருந்ததாகக் கூறப்படுகிறது. உடனடியாக அவர் அப்பகுதி மக்களின் உதவியுடன் போலீசாருக்குத் தகவல் தெரிவித்துள்ளார்.
தகவலறிந்து சம்பவ இடத்திற்கு விரைந்து வந்த போலீசார், குழந்தையைப் பத்திரமாக மீட்டு கள்ளக்குறிச்சி அரசு மருத்துவக் கல்லூரி மருத்துவமனைக்கு அனுப்பி வைத்தனர். அங்கு குழந்தைக்கு மருத்துவக் கண்காணிப்புடன் சிகிச்சை அளிக்கப்பட்டு வருகிறது.
பிறந்து சில மணி நேரங்களே ஆன பச்சிளம் குழந்தையை வயல்வெளியில் விட்டுச் சென்றது யார்? எதற்காக இந்தச் செயலில் ஈடுபட்டனர்? என்பது குறித்து போலீசார் விசாரணை மேற்கொண்டு வருகின்றனர்.
மேலும், குழந்தையை அங்கு கொண்டு வந்து விட்டுச் சென்றவர்களைக் கண்டறிய புதிய பேருந்து நிலையம் மற்றும் அதன் சுற்றுவட்டாரப் பகுதிகளில் உள்ள கண்காணிப்பு கேமரா காட்சிகளையும் ஆய்வு செய்து வருகின்றனர்.
உயிருக்கு ஆபத்தான சூழலில் இருந்த பச்சிளம் குழந்தையை சரியான நேரத்தில் கண்டறிந்து மீட்ட விவசாயியின் செயல் அப்பகுதி மக்களிடையே பாராட்டைப் பெற்றுள்ளது.
பச்சிளம் குழந்தையைப் பாதுகாப்பாக மீட்ட சம்பவம் நெகிழ்ச்சியை ஏற்படுத்தியுள்ள நிலையில், குழந்தையை விட்டுச் சென்றவர்கள் யார் என்ற கேள்வி அப்பகுதியில் எழுந்துள்ளது.










